Milimetroak-etik Kilometroak-era

2018ko maiatzean, Amasa-Villabona eta Zizurkilgo Zubimusu ikastolak antolatu zuen lehenengoz Milimetroak festa. 

Zubimusuk argi zuen ikastolak kalera atera nahi eta behar zuela; kalera, espazio publikoa delako; kalera, herriko eragile ugari biltzen delako bertan; kalera, Zubimusu ikastolaren azken urteetako eraldaketa plazaratzearekin batera, etorkizunari begira jarri nahi zuelako. Ikastolak herrian eragin behar duelako, herritarrekin batera.

Kilometroak jai handitik Milimetroak festa txikiagora, indarrak batuz, auzolana bultzatuz… Jendartetik jende multzo bilduagora, kontsumo eredutik parte-hartze aktibora; euskara iparrorratz, gazteak bidelagun, naziotasuna aldarri, hezkuntza eta aisialdia eskutik lotuta... Horiexek egun hartan bete ziren helburuetako batzuk.

Kilometroak jaiaren eredu berriaren ateetan, pausaleku interesgarria izan zen Milimetroak festa, bai antolaketari nola emaitzari begira. Formatu txikia, berritzailea, erakargarria… Eta baita eraginkorra ere. Esperotako fruituak eman baitzituen, eta baita gehiago ere. Izan ere, Milimetroak festaren amaieran iragarri zen 2020ko Kilometroak jaia Amasa-Villabona eta Zizurkilen burutuko zela. Albiste pozgarria, Zubimusu ikastolako irakasle, ikasle nahiz guraso, helburu beraren bueltan batu dituena.

Euskal Herrirako hezkuntza-eredu propioa oinarri, euskara sustatuz eta bultzatuz beti, hainbat balio bildu nahi du bere baitan eredu berriko Kilometroak festak: anitza, euskalduna, sortzailea, parte-hartzailea, herritarra, herrikoia edota, besteak beste, jasangarria izatea.

Pausoz pauso, eskuz esku, Zubimusu ikastola osatzen duen komunitateak bere gain du orain eredu berriko lehen Kilometroak festa antolatzeko ardura. Ardura eta erronka, lehenengo aldiak dakarren errespetuari, ilusioak eta gogoak gaina hartuta. Patroirik gabeko Kilometroak festa ehundu behar du Zubimusu ikastolak, guztien ideia eta proposamenak entzun, jaso, osatu eta orraztuz. Izan dadila bide-urratzaile herrian bezala, eskualdean, Gizpuzkoan eta Euskal Herri osoan.